झापा । नेपाली कांग्रेसको १५औँ महाधिवेशनअन्तर्गत झापाको बिर्तामोड नगर कार्यसमितिमा निर्वाचित नयाँ पदाधिकारी तथा सदस्यलाई प्रमाणपत्र वितरणसँगै शपथग्रहण गराइएको छ। नगर कार्यसमितिको निर्वाचन सम्पन्न भएको केही दिनपछि बुधबार आयोजित कार्यक्रममा निर्वाचन अधिकृतले निर्वाचित पदाधिकारी तथा सदस्यलाई प्रमाणपत्र वितरण गर्दै पद तथा गोपनीयताको शपथ गराउनुभएको हो।

२९ मतान्तरले कुलप्रसाद संग्रौला नगर सभापतिमा निर्वाचित, सहसचिवमा बराबरीपछि गोलाप्रथाबाट राजेश धिमाल विजयी

नेपाली कांग्रेस केन्द्रीय कार्यसमितिको निर्णयअनुसार वडा तह हुँदै नगर तहसम्मको अधिवेशन प्रक्रिया असोज ३ गतेदेखि सुरु भएर असोज ८ गतेसम्म सम्पन्न भएको थियो। सोही क्रममा बिर्तामोड नगर कार्यसमितिको सभापति, दुई उपसभापति, सचिव र सहसचिव पदका लागि निर्वाचन भएको थियो। अन्य सदस्य पदमा भने निर्विरोध नेतृत्व चयन गरिएको थियो।

बिर्तामोड नगर कार्यसमितिको निर्वाचनमा वडा सभापति तथा क्षेत्रीय प्रतिनिधिसहित कुल ३ सय ५६ मतदाता रहेका थिए। त्यसमध्ये ३ सय ४४ मत खसेको निर्वाचन अधिकृतको विवरण छ।

नगर सभापति पदमा कुलप्रसाद संग्रौला र सूर्यप्रसाद कन्दङ्वाबीच प्रतिस्पर्धा भएको थियो। निर्वाचनमा संग्रौलाले १ सय ८४ मत प्राप्त गर्दा कन्दङ्वाले १ सय ५५ मत प्राप्त गर्नुभयो। संग्रौला २९ मतको अन्तरले नगर सभापतिमा निर्वाचित हुनुभयो। सभापति पदमा खसेको मतमध्ये ५ मत बदर भएको थियो। संग्रौलाको १८४ र कन्दङ्वाको १५५ मत गरी ३३९ सदर मत तथा ५ बदर मतसहित कुल ३४४ मतको परिणाम बनेको हो।

यससँगै बिर्तामोड नगर कांग्रेसको नयाँ नेतृत्वमा कुलप्रसाद संग्रौलाले जिम्मेवारी सम्हाल्नुभएको छ। निर्वाचनपूर्व पनि संग्रौला र कन्दङ्वाबीच नगर सभापति पदमा प्रतिस्पर्धा हुने विषय बिर्तामोड कांग्रेसमा चर्चामा थियो।

त्यस्तै, खुला उपसभापति पदमा रमेश चौधरी निर्वाचित हुनुभएको छ। चौधरीले २ सय २२ मत प्राप्त गर्दा उहाँका प्रतिस्पर्धी सञ्जीव चापागाईंले १ सय ६ मत प्राप्त गर्नुभयो। चौधरी १ सय १६ मतको अन्तरले विजयी हुनुभएको हो। उक्त पदमा कुल १६ मत बदर भएको निर्वाचन परिणाममा उल्लेख छ।

महिला उपसभापति पदमा भने सीतादेवी चुडाल निर्वाचित हुनुभएको छ। उहाँले १ सय ८५ मत प्राप्त गर्दा प्रतिस्पर्धी सुष्मा भण्डारी पौडेलले १ सय ३९ मत प्राप्त गर्नुभयो। चुडाल ४६ मतको अन्तरले विजयी हुनुभएको हो।

सचिव पदमा आशिष वन निर्वाचित हुनुभएको छ। सचिवका लागि उत्तमकुमार कटुवाल र आशिष वनबीच प्रतिस्पर्धा भएको थियो। कटुवालले १ सय १२ मत प्राप्त गर्दा वनले २ सय १५ मत प्राप्त गर्नुभयो। वन १ सय ३ मतको अन्तरले सचिवमा निर्वाचित हुनुभएको हो। सचिव पदमा १७ मत बदर भएको निर्वाचन अधिकृतको विवरण छ।

बिर्तामोड नगर कांग्रेसको सहसचिव पदको परिणाम भने अन्य पदको तुलनामा फरक ढंगले टुंगिएको थियो। सहसचिव पदमा प्रेमप्रसाद घिमिरे र राजेशकुमार धिमाल (राजीव) ले समान १ सय ६१–१ सय ६१ मत प्राप्त गर्नुभएको थियो। उक्त पदमा २२ मत बदर भएको निर्वाचन अधिकृत केशवराज भण्डारीले जानकारी दिनुभएको छ।

समान मत आएपछि सहसचिव पदको अन्तिम परिणाम निकाल्न निर्वाचन प्रक्रियाअनुसार दुवै उम्मेदवारबीच गोलाप्रथा गरिएको थियो। गोलाप्रथाबाट राजेशकुमार धिमाल (राजीव) विजयी हुनुभएको हो।

 

पदाधिकारीबाहेक नगर कार्यसमितिका अन्य सदस्यहरू भने निर्विरोध चयन भएका छन्। महिला सदस्यतर्फ जमुना कुमारी राजवंशी, प्रमिला भट्टराई, सवित्रा ओडारी, धनमाया चुडाल, लक्ष्मिमाता सेवाहाङ, निर्मला खड्का (पाठक), शरु भट्टराई, शोभा आचार्य र अम्बिका विश्वकर्मा निर्विरोध चयन हुनुभएको छ।

त्यस्तै खुला सदस्यतर्फ हरिभक्त उप्रेती, खेमप्रसाद सिटौला, देवनारायण शर्मा, योगराज श्रेष्ठ, राजेन्द्र सिटौला, रोशन दास, दीपककुमार प्रधान, सलबहादुर गुरुङ र सञ्जोग पराजुली चयन हुनुभएको छ।

३५ वर्षमुनिका युवा सदस्यतर्फ सन्जु संग्रौला, विनोद तामाङ, अनिस सुवेदी र गोमा लावर सिवा निर्विरोध चयन हुनुभएको छ।

नगर कार्यसमितिले मनोनयन गर्ने ९ जना सदस्य, वडा नम्बर १० को प्रतिनिधित्व गर्ने एक महिलासहित दुई जना सदस्य तथा एक दलित खुला सदस्य पदमा भने नगर कार्यसमितिले निर्णय गरी मनोनयन गर्ने बताइएको छ।

नवनिर्वाचित कार्यसमितिलाई नगरका प्रमुख निर्वाचन अधिकृत केशवराज भण्डारीले बुधबार आयोजित कार्यक्रममा प्रमाणपत्र वितरण गर्नुभएको थियो। प्रमाणपत्र वितरणपछि निर्वाचित पदाधिकारी तथा सदस्यलाई पद तथा गोपनीयताको शपथसमेत गराइएको थियो।

कार्यक्रममा संविधानसभा सदस्य तथा नेपाली कांग्रेसका केन्द्रीय सदस्य सुधीरकुमार सिवाकोटी प्रमुख अतिथिका रूपमा सहभागी हुनुभएको थियो। त्यस्तै नेपाली कांग्रेसकी केन्द्रीय सदस्य उमा सिवाकोटी विशेष अतिथिका रूपमा सहभागी हुनुभएको थियो।

कार्यक्रममा नेपाली कांग्रेसका निवर्तमान नगर सभापति तथा नवनिर्वाचित महाधिवेशन प्रतिनिधि भोजराज सिटौलालगायत पार्टीका नेता तथा कार्यकर्ताको उपस्थिति रहेको थियो।

बिर्तामोड नगर कांग्रेसको नयाँ नेतृत्व चयनका क्रममा सभापतिसहित पदाधिकारी पदमा भएको प्रतिस्पर्धाले नगर अधिवेशनलाई निर्वाचनमुखी बनाएको थियो। विशेषगरी सभापति पदमा संग्रौला र कन्दङ्वाबीच भएको प्रतिस्पर्धा तथा अन्य पदाधिकारी पदमा देखिएको मतपरिणामले नगर कांग्रेसको आन्तरिक प्रतिस्पर्धाको स्वरूप देखाएको छ।

अब प्रमाणपत्र वितरण र शपथग्रहणसँगै बिर्तामोड नगर कांग्रेसको नयाँ कार्यसमितिले औपचारिक रूपमा जिम्मेवारी सम्हालेको छ। निर्वाचित नेतृत्वसँगै निर्विरोध चयन भएका सदस्य तथा आगामी चरणमा मनोनयन हुने सदस्यलाई समेत समेटेर नगर कार्यसमिति पूर्ण हुने प्रक्रियामा अघि बढ्नेछ।

यससँगै नेपाली कांग्रेसको १५औँ महाधिवेशनअन्तर्गत बिर्तामोड नगर तहको नेतृत्व चयन प्रक्रिया औपचारिक रूपमा सम्पन्न भएको छ। निर्वाचनबाट निर्वाचित नेतृत्वले पार्टीको नगर संगठनलाई आगामी कार्यकालमा कसरी अघि बढाउँछ भन्ने विषय अब नयाँ कार्यसमितिको जिम्मेवारीमा आएको छ।