प्याव्सन झापामा आबद्ध सबै सदस्य विद्यालयका कक्षा १ देखि १० सम्म अध्ययनरत विद्यार्थीलाई सहभागी गराउँदै प्रतियोगिता सञ्चालन गर्न लागिएको हो। विद्यार्थीमा रहेको अन्तर्निहित प्रतिभा पहिचान तथा प्रस्फुटन गर्ने र सिकाइसँग प्रत्यक्ष सरोकार राख्ने अतिरिक्त क्रियाकलापलाई विद्यालय शिक्षाको अभिन्न पक्षका रूपमा विकास गर्ने उद्देश्यले कार्यक्रम आयोजना गर्न लागिएको प्याव्सन झापाले जनाएको छ।
प्रतियोगितामा ११ वटा विभिन्न विधा समावेश गरिएको छ। कक्षा ३ सम्मका विद्यार्थीका लागि रंग भर्ने, कक्षा ५ सम्मका लागि चित्रकला, हाजिरीजवाफ, नेपाली तथा अंग्रेजी निबन्ध लेखन, कक्षा ६ देखि ८ सम्म हाजिरीजवाफ, नेपाली तथा अंग्रेजी निबन्ध लेखन, , कविता वाचन, आकस्मिक वक्तृत्वकलालगायतका विधामा प्रतियोगिता सञ्चालन हुनेछ। कक्षा ९ र १० का विद्यार्थीका लागि निबन्ध लेखन तथा आकस्मिक वक्तृत्वकला प्रतियोगिता आयोजना गरिनेछ। वक्तृत्वकला प्रतियोगिता नेपाली र अंग्रेजी दुवै माध्यममा सञ्चालन हुनेछ।
प्याव्सन झापाका सचिव तथा अतिरिक्त क्रियाकलाप उपसमितिका संयोजक लक्ष्मीप्रसाद उप्रेतीका अनुसार प्रतियोगितामा जिल्लाका सबै पालिकाबाट विद्यार्थी सहभागी हुनेछन्। पालिकास्तरमा हुने प्रारम्भिक प्रतियोगितामा करिब ६ हजार विद्यार्थी सहभागी हुने अनुमान गरिएको छ। प्रत्येक पालिकाबाट उत्कृष्ट विद्यार्थी छनोट गरी जिल्ला स्तरीय प्रतियोगितामा सहभागी गराइनेछ।
कार्यक्रमलाई एकरूपता र निष्पक्ष बनाउन झापाका सबै पालिकामा एउटै प्रश्नपत्र र एउटै समयमा प्रतियोगिता सञ्चालन गर्ने तयारी गरिएको छ। प्रश्नपत्र, उत्तरपुस्तिका, निर्णायक तथा व्यवस्थापनलगायत आवश्यक तयारी पूरा भइसकेको आयोजकले जनाएको छ।
प्रतियोगिताको व्यवस्थापनका लागि प्याव्सन झापाले अतिरिक्त क्रियाकलाप उपसमिति गठन गरेको छ। उपसमितिको संयोजकमा प्याव्सन झापाका सचिव लक्ष्मीप्रसाद उप्रेती तथा सदस्यमा टेकनाथ तिम्सिना र गोपाल राजवंशी रहेका छन्।
प्रतियोगिताको प्रभावकारी सञ्चालन तथा अनुगमनका लागि पालिकागत रूपमा अनुगमन समिति समेत गठन गरिएको छ। पालिका अध्यक्ष तथा कार्यसमितिका पदाधिकारीलाई कार्यक्रममा उपस्थित गराई प्रतियोगितालाई सभ्य, भव्य र व्यवस्थित रूपमा सञ्चालन गर्ने तयारी गरिएको प्याव्सन झापाले जनाएको छ।
पालिकास्तरमा सम्पन्न हुने प्रतियोगिताबाट छनोट भएका विद्यार्थीबीच भदौ २३ गते जिल्ला स्तरीय प्रतियोगिता सञ्चालन गरिनेछ। जिल्ला स्तरीय कार्यक्रममा कक्षा ६ देखि ८ सम्मका विद्यार्थीबीच हाजिरीजवाफ तथा कक्षा ९ र १० का विद्यार्थीबीच आकस्मिक वक्तृत्वकला प्रतियोगिता हुने जनाइएको छ।
विद्यार्थीको पाठ्यक्रममा आधारित सिकाइलाई अतिरिक्त क्रियाकलापसँग जोड्दै उनीहरूको बौद्धिक, सिर्जनात्मक, भाषिक तथा प्रस्तुति क्षमता विकास गर्ने लक्ष्यसहित कार्यक्रम आयोजना गरिएको प्याव्सन झापाले जनाएको छ।
प्रतियोगितामा सहभागी हुने सबै विद्यार्थीलाई अग्रिम शुभकामना दिँदै प्याव्सन झापाका सचिव उप्रेतीले अतिरिक्त क्रियाकलापमार्फत विद्यार्थीमा रहेको प्रतिभा पहिचान र प्रस्फुटनका लागि कार्यक्रम महत्वपूर्ण हुने बताए। उनका अनुसार प्रतियोगितालाई केवल प्रतिस्पर्धाका रूपमा नभई विद्यार्थीको सिकाइ, क्षमता विकास र आत्मविश्वास अभिवृद्धिसँग जोडेर सञ्चालन गरिनेछ।
शुक्रवार, भदौ १२, २०८३
