झापा / लैङ्गिक हिंसा विरुद्धको १६ दिने अभियानको अवसर पारेर झापा जिल्लाको मेचिनगर नगरपालिका–४ को कार्यालय परिसरमा आइतबार लैङ्गिक विभेद, यौनजन्य हिंसा, शोषण तथा बालविवाह रोकथामसम्बन्धी एकदिने अभिमुखीकरण कार्यक्रम सम्पन्न भएको छ । समाजमा बढ्दो लैङ्गिक असमानता, यौनजन्य दुव्र्यवहार, घरेलु हिंसा तथा बाल अधिकार उल्लंघनका घटनालाई नियन्त्रण गर्दै सर्वसाधारणमा चेतना अभिवृद्धि गर्ने उध्येश्य सहित कार्यक्रम सम्पन्न भएको हो । कार्यक्रमका अध्यक्ष मेचिनगर–४ का वडा अध्यक्ष अर्जुनकुमार कार्कीले स्थानीय सरकार हिंसा पीडितको संरक्षण, न्याय प्राप्ति र पुनस्र्थापनामा संवेदनशील रहेको बताउनुभयो । उहाँले हिंसामुक्त समाज निर्माणका लागि जनप्रतिनिधि, नागरिक समाज, युवा तथा महिलाबीच सशक्त सहकार्य हुनुपर्नेमा जोड दिनुभयो । कार्कीले स्थानीय स्तरमै यस्ता अभिमुखीकरण तथा जनचेतनामूलक कार्यक्रमहरू निरन्तर गरिनु आवश्यक रहेको उल्लेख गर्दै आयोजक कन्काई इन्टरनेशनल बिल्डर्स प्रा.लि र सहजकर्ता बिज्ञहरुप्रति धन्यवाद दिनुभयो । कार्यक्रम कन्काई इन्टरनेशनल बिल्डर्स प्रा.लि. को आयोजनामा गरिएको थियो । कम्पनीले मेचिनगर नगरपालिकामा सूर्योदय मार्ग स्तरोन्नति गर्ने योजना अन्तर्गत हाल निर्माणकार्य गरिरहेको छ । सोही क्रममा सामाजिक उत्तरदायित्व (Corporate Social Responsibility – CSR) अन्तर्गत समुदायमै प्रत्यक्ष प्रभाव पार्ने कार्यक्रम सञ्चालन गर्नुपर्ने आवश्यकता महसुस गर्दै अभिमुखीकरण आयोजना गरिएको कम्पनीले जनाएको छ । अभिमुखीकरण कार्यक्रममा सहभागीहरूलाई लैङ्गिक हिंसाका प्रकार, कारण, प्रभाव तथा रोकथामका उपायहरूबारे व्यावहारिक जानकारी प्रदान गरिएको थियो । कार्यक्रमका प्रमुख सहजीकरणकर्तामध्ये मेचिनगर नगरपालिका महिला, बालबालिका तथा ज्येष्ठ नागरिक शाखा प्रमुख तथा महिला विकास अधिकृत जयन्ती खरेलले स्थानीय तहमा लैङ्गिक समानता प्रवद्र्धनमा समुदायको भूमिकालाई विशेष महत्व दिँदै लैङ्गिक विभेदको जरा समाजकै सोचमा रहेको बताउनुभयो । यस्तै, लैङ्गिक हिंसा रोकथाम तथा प्रतिकार्यका लागि एकीकृत सेवा पहुँच परियोजना प्रमुख कमला उप्रेती रिजालले महिलामाथि हुने मानसिक, शारीरिक, आर्थिक तथा यौनजन्य हिंसाका रूपहरूबारे विस्तृत जानकारी दिँदै सेवाप्रवाह प्रणाली र पीडितले कहाँ–कहाँबाट सहयोग पाउन सक्छन् भन्ने विषयमा ध्यानाकर्षण गराउनुभयो । उहाँले प्रचलित कुप्रथाहरू समाजकै मौन सहमतिको कारण टिकिरहेकाले समुदायगत प्रतिरोध र सचेतना अपरिहार्य रहेको बताउनुभयो । अभिमुखीकरणका सहभागीहरू बाट लैङ्गिक हिंसाको प्रभाव बालबालिका, किशोरी तथा महिला माथि बढी पर्ने भएकाले विद्यालय, परिवार, समुदाय र स्थानीय तह सबैले समान जिम्मेवारी साझा गर्नुपर्ने सुझाव प्राप्त भएको थियो । कार्यक्रमले आफूहरूलाई व्यवहारिक जानकारी तथा आईनसम्बन्धी आधारभूत समझ प्रदान गरेको बताउँदै आगामी दिनमा पनि यस्ता कार्यक्रम निरन्तर हुनुपर्नेमा जोड दिनुभएको थियो । मेचिनगर नगरपालिका पुर्वाधार शाखा प्रमुख जिवन भट्टराईले समाज सम्बेदनशील बन्दै गरेको सन्दर्भमा निर्माण आयोजना सञ्चालन हुने स्थानमा हुने गरेका विभिन्न लाभ लगायतका विषयमा बुझ्न पाउनका लागि कार्यक्रम कोशेढुंगा सावित हुने बताउनुभयो । सामाजिक उत्तरदायित्वका कार्यक्रममार्फत कम्पनीहरूले समुदायमा सकारात्मक प्रभाव पार्न सक्ने उदाहरणका रूपमा लिइएको यो अभिमुखीकरणले १६ दिने अभियानको सार्थकता बढाएको सहभागीहरूको भनाइ छ । कार्यक्रम सफलतापूर्वक सम्पन्न गर्दै आयोजक तथा सहजीकरणकर्ताले लैङ्गिक हिंसामुक्त समाज निर्माणका लागि निरन्तर सहकार्यको प्रतिवद्धता व्यक्त गर्दै कार्यक्रम सम्पन्न भएको थियो । कार्यक्रम कम्पनीका तर्फवाट इन्जिनियर बिदुर मैनालीले सञ्चालन गर्नुभएको थियो ।