झापा/ झापाको मेचिनगर नगरपालिकाले ३४औँ लैङ्गिक हिंसा विरुद्धको १६ दिने अभियान निरन्तररूपमा विभिन्न गतिविधिसाथ सञ्चालन गरिरहेको छ ।
‘प्रविधिको सही प्रयोग गरौँ ः लैङ्गिक हिंसा अन्त्य गरौँ’ भन्ने मूल नाराका साथ मंसिर ९ गतेदेखि सुरु भएको अभियानअन्तर्गत शुक्रबार साइबर क्राइम सम्बन्धी प्रशिक्षण कार्यक्रम सम्पन्न गरेको छ ।
प्रशिक्षणमा कक्षा १२ का विद्यार्थीहरूको सहभागिता रहेको थियो । १६ दिने अभियानमा प्रविधिको सही सदुपयोग गर्न आग्रह गर्दै मेचिनगर नगरपालिका नगर उपप्रमुख मिना पोखरेल (उप्रेती) ले यसको सही सदुपयोग हुन नसके जीवनयापन असहज हुने बताउनुभयो ।
बिगत १० वर्षयता प्रविधिको द्रुततर विकास भइरहेको सन्दर्भमा इन्टरनेट जो–कोहीका लागि अध्ययन गर्न महत्वपूर्ण प्लेटफर्मका रूपमा विकास भएको देखिन्छ । तर यसको दुरुपयोगका कारण मानव जीवनमा नकारात्मक ऊर्जा थपिएका थुप्रै घटनाहरूसमेत बाहिर आउन थालेका छन् ।
प्रविधिको सदुपयोग नै अहिले समयको माग र नयाँ पुस्ताको भविष्यसँग जोडिएकोले यसको दुरुपयोगले विकासको बाटो लिन नसक्ने र यो संवेदनशील वा नाजुक (Fragile Glass) हुने हुँदा प्रविधिको प्रयोग गर्दा संवेदनशील र सचेत रहन मेचिनगर नगरपालिका झापाका प्रमुख प्रशासकीय अधिकृत अग्नि प्रसाद अधिकारीले आग्रह गर्नुभयो ।
इन्टरनेटबाट धेरै राम्रा कामहरू पनि हुने गरेको बताउँदै मेचिनगर नगरपालिका शिक्षा शाखा प्रमुख होम भण्डारीले इन्टरनेटको दुरुपयोगबाट आपराधिक गतिविधि समेत हुने गरेको हुँदा यसको नियमनका लागि कानुन बनिसकेको बताउनुभयो ।
मेचिनगर नगरपालिकामा लैङ्गिक हिंसा रोकथाम तथा प्रतिकार्यका लागि एकीकृत सेवा पहुँच परियोजना समेत सञ्चालनमा रहेको छ । जुन कार्यक्रमका लागि लैङ्गिक हिंसा प्रतिकार्य विज्ञ (GBV Specialist) कमला उप्रेती रिजालले काम गरिरहनुभएको छ । सामाजिक सञ्जालका माध्यमबाट हुने साइबर बुलिङ (Bullying) साथै हेरास्मेन्ट (Harassment) लगायतका गतिविधिहरू तथा अनलाइन कुराकानी (chatting) का माध्यमबाट हुने अभद्र किसिमका म्यासेज, तस्बिरहरू, लिङ्कहरूका माध्यमबाट हिंसाका गतिविधिहरु हुने गरेको जिविभी एक्सपर्ट कमला उप्रेती (रिजाल) ले बताउनुभयो ।
प्रहरी निरीक्षक विरेन्द्र राज कोइराला र सहायक प्रहरी निरीक्षक मिलन कुमारी राईले साइबर अपराध, यसका लागि बनेको कानुनी व्यवस्था, सदुपयोग साथै दुरुपयोग लगायतका विषयमा प्रशिक्षण दिनुभएको थियो ।
विज्ञ तथा सुरक्षा निकायका प्रतिनिधिहरूले कक्षा लिनुभएको कार्यक्रममा मेचिनगर नगरपालिका भित्रका ७ वटा माध्यमिक तह कक्षा ११ र १२ अध्ययन गर्ने विद्यार्थीहरूको प्रतिनिधिमूलक सहभागिता रहेको कार्यक्रम मेचिनगर नगरपालिका महिला, बालबालिका तथा ज्येष्ठ नागरिक शाखा प्रमुख तथा महिला विकास अधिकृत जयन्ती खरेलले सञ्चालन गर्नुभएको थियो ।
