झापा/ श्रावण महिनाको पहिलो सोमबारलाई हिन्दू धर्मावलम्बीहरूले अत्यन्तै पवित्र दिनका रूपमा मनाउने गर्छन् । यो दिन विशेषगरी भगवान शिवको आराधना गर्दै जल, बेलपत्र, धतुरो, आक, दूधजस्ता सामग्री चढाउने, ब्रत बस्ने र पूजाआजा गर्ने परम्परा छ । आजको दिन झापा जिल्लास्थित पवित्र धार्मिक स्थल सतासीधाममा पनि श्रद्धालु भक्तजनहरूको अपार भीड देखिएको छ । पहिलो सोमबार मात्र नभएर श्रावण महिना भरका सोमबारहरुमा भक्तजनका लागि चियापानी, लगायतका खाद्यान्न ब्यवस्थापन गरिएको सतासीधाम धार्मीक पर्यटन विकास समितिका अध्यक्ष तुला बोख्खिमले बताउनुभयो । झापाको शिवसताक्षी नगरपालिका अन्तर्गत पर्ने सतासीधाम पूर्वी नेपालकै एक प्रमुख धार्मिक तथा पर्यटकीय गन्तव्यका रूपमा चिनिन्छ । यहाँको ऐतिहासिक, सांस्कृतिक र प्राकृतिक महत्वले गर्दा वर्षेनी लाखौं भक्तजन तथा पर्यटकहरू तानिने गरेका छन् । सतासीधामको विकास र सम्बद्र्धनमा नयाँ बनेको कार्यसमितिले धेरै उपलब्धिमुलक कामहरु गरेको नेपाल रेडक्रस सोसाइटी उपशाखा शिवसताक्षीका सभापती गोविन्द काफ्लेले बताउनुभयो । श्रावण महिनामा विशेषतः सोमबारको दिन सतासीधाममा भक्तजनहरूको चाप अत्यधिक हुने गर्दछ । सतासी धाम केवल धाम मात्र होइन पिडा भुलाउने, आनन्द प्रदान गर्ने क्षेत्रका रुपमा समेत आफुले लिने गरेको शिवसताक्षी नगरपालिका वडा नं. ८ कि स्थानिय तारा लाओतीले बताउनुभयो । आजको दिन सतासीधाममा श्रद्धालुहरूले बिहानैदेखि स्नान गरी भगवान शिवको दर्शन र पूजामा सहभागी भएका थिए । शिवलिंगमा जल चढाउने, बेलपत्र अर्पण गर्ने, धूप–दीप बालेर पूजा गर्ने, मन्त्र जप्ने तथा ब्रत बस्ने धार्मिक कार्यक्रमहरू निरन्तर चलिरहेका थिए । धाम समितिले प्रभावकारी योजना तर्जुमा गरेर धामको उचित ब्यवस्थापन गर्ने लक्ष तर्फ ध्यान दिएको धाम समितिका सहसचिव डिगबहादुर बुढाथोकीले बताउनुभयो । कतिपय भक्तजन टाढाटाढाबाट पदयात्रा गरी आएको दृश्यले धार्मिक आस्थाको गहिरो झल्को दिएको छ । तिर्थ यात्रीहरुका लागि नास्ता सहित भोजनको समेत ब्यवस्थापन गरिएको धाम समितिका सचिव कालि प्रसाद रिजालले बताउनुभयो । सतासीधाममा केवल भगवान शिवको मात्र होइन, विभिन्न देवी–देवताहरूको समेत आराधना गरिन्छ । यहाँको मुख्य मन्दिर परिसरमा रहेको विशाल गौशाला, बिरेनुन पानी, झरना, सतासी धारा लगायतका आकर्षणहरूले आगन्तुकहरूको मन लोभ्याउँछन् । सतासीधाम धार्मिक तथा पर्यटन विकास समितिको सक्रियता र समर्पणले गर्दा यस क्षेत्रको सौन्दर्य दिनप्रतिदिन बढ्दो क्रममा छ । समितिको तर्फबाट विभिन्न मन्दिरहरूको पुनर्निर्माण, पुरातात्त्विक सम्पदाको जिर्णोद्धार, बाटोघाटोको सौन्दर्यीकरण, हरियाली संरक्षण लगायतका कामहरू प्रभावकारी रूपमा सम्पन्न हुँदै आएका छन् । यस पटकको धाममा दर्शनका लागि आउने भक्तजनहरुका लागि महिला उप समितिले ब्यवस्थापन मिलाउने धाम समितिका सदस्य खनिमायाँ श्रेष्ठले बताउनुभयो । विगत केही वर्षयता सतासीधामले धार्मिक पर्यटनको सम्भावना बोकेको क्षेत्रको रूपमा छुट्टै पहिचान बनाउन सफल भएको छ । नेपाल सरकार, स्थानीय निकाय तथा भक्तजनहरूको साझा प्रयासबाट यहाँको विकास तीव्र गतिमा अगाडि बढिरहेको छ । भारत, भुटान, बंगलादेश लगायतका छिमेकी मुलुकहरूबाट समेत श्रद्धालुहरू सतासीधाम दर्शनका लागि आउने क्रम बढ्दो छ । यसले केवल धार्मिक महत्व मात्र होइन, सामाजिक तथा आर्थिक रूपमा पनि यस क्षेत्रलाई बलियो बनाउँदै लगेको छ । श्रावणको पहिलो सोमबारको भण्डाराका लागि शिवसताक्षी नगरपालिकामा रहेको कन्चनजंघा समूहले काम गरेको धाममा सञ्चालन भएको भण्डारा उप समितिका सचिव भगिरथ घिमिरेले बताउनुभयो । यसरी श्रावण महिनाको पहिलो सोमबार झैँ विशेष दिनहरूले सतासीधाममा धार्मिक ऊर्जा थप्ने मात्र होइन, सम्पूर्ण क्षेत्रको पर्यटन विकासमा समेत टेवा पुर्याएको छ । धार्मिक भावनाले ओतप्रोत भक्तजनहरूको उपस्थिति, समितिको प्रयास, प्राकृतिक सौन्दर्य र सांस्कृतिक वैभवले गर्दा सतासीधाम भविष्यमा अझ अन्तर्राष्ट्रिय गन्तव्यको रूपमा स्थापित हुने विश्वास लिइएको छ । धार्मिक पर्यटनको उत्कृष्ट उदाहरणका रूपमा सतासीधामले पूर्वी नेपालको गौरवमय परिचयलाई अझ मजबुत बनाउँदै गएको छ । यहाँको आध्यात्मिक शान्ति, धार्मिक सम्पदा र प्राकृतिक सुन्दरताले गर्दा श्रद्धालुहरू मात्र होइन, सामान्य पर्यटकहरूका लागि पनि यो स्थान एक अविस्मरणीय अनुभव दिने गन्तव्य बन्ने सम्भावना छ ।