झापा, बिर्तामोड / बढ्दो महँगी, सीमित आम्दानी र दैनिक उपभोग्य वस्तुको मूल्यवृद्धिबीच गुणस्तरीय सामग्री सस्तो मूल्यमा पाउनु उपभोक्ताका लागि चुनौती बन्दै गएको छ । विशेषगरी जुत्ता, कपडा तथा व्यक्तिगत प्रयोगका सामग्री खरिद गर्दा खर्चको दबाब धेरै परिवारले महसुस गरिरहेका छन् । तर झापाको बिर्तामोडमा सञ्चालनमा रहेको एक ‘जुत्ता मेला’ यतिबेला उपभोक्ताका लागि सहुलियतपूर्ण किनमेलको विकल्प बनेर उदाएको छ ।
“एक हजार रुपैयाँमा छानी–छानी जुत्ता पाइन्छ” भन्ने कुरा पहिलो पटक सुन्दा धेरैलाई विश्वास नलाग्न सक्छ । तर बिर्तामोड नगरपालिकास्थित सिटी सेन्टरको माथिल्लो तलामा सञ्चालन गरिएको जुत्ता मेलामा भने वास्तवमै करिब एक हजार रुपैयाँको मूल्य आसपासमा विभिन्न डिजाइन, शैली र ब्रान्डका जुत्ता उपभोक्ताले छनोट गर्न सक्ने व्यवस्था गरिएको छ ।
झापाका युवा व्यवसायी सुमन नेपाली ले सञ्चालन गरेको उक्त शोरुम यतिबेला उपभोक्तामाझ लोकप्रिय बन्दै गएको छ । सहुलियत मूल्य, विविध डिजाइन तथा सहज पहुँचका कारण यो स्थान धेरैका लागि किनमेलको रोजाइ बन्न थालेको व्यवसायी बताउँछन् ।
शोरुममा पुरुष, महिला तथा युवापुस्तालाई लक्षित गर्दै विभिन्न प्रकारका जुत्ता राखिएको छ । दैनिक प्रयोगदेखि विशेष अवसरमा लगाइने डिजाइनसम्मका सामग्री उपलब्ध गराइएको छ । उपभोक्ताले आफ्नो रुचि, आवश्यकता तथा बजेटअनुसार जुत्ता छनोट गर्न सक्ने वातावरण बनाइएको व्यवसायीको भनाइ छ ।
व्यवसायी सुमन नेपालीका अनुसार पछिल्लो समय बढ्दो महँगीका कारण आम उपभोक्ताको क्रयशक्ति प्रभावित भइरहेको अवस्था छ । यस्तो समयमा सीमित आम्दानी भएका नागरिकलाई राहत पुग्ने गरी सहुलियत मूल्यमा सामग्री उपलब्ध गराउने उद्देश्यले जुत्ता मेला सञ्चालन गरिएको हो ।
उहाँका अनुसार अत्यधिक नाफा कमाउनेभन्दा कम नाफामा धेरै बिक्री गर्ने अवधारणालाई प्राथमिकता दिइएको छ । “उपभोक्ताले गुणस्तरीय सामान उचित मूल्यमा पाउनुपर्छ भन्ने हाम्रो सोच हो,” व्यवसायी नेपाली भन्छन्, “महँगीका कारण धेरै परिवार आवश्यक सामग्री किनमेल गर्न पनि सोच्न बाध्य भइरहेका बेला हामीले थोरै नाफामा धेरै ग्राहकलाई सेवा दिने उद्देश्य राखेका छौँ ।”
सिटी सेन्टरमा सञ्चालन भइरहेको जुत्ता मेलामा ग्राहकको चहलपहल पनि बढ्न थालेको देखिन्छ । विशेषगरी युवा वर्ग, विद्यार्थी तथा मध्यम तथा न्यून आय भएका परिवारका सदस्यहरू यहाँ आकर्षित हुने गरेका छन् । कम मूल्यमा आकर्षक डिजाइन र विभिन्न विकल्प उपलब्ध भएकाले उपभोक्ताले सहज महसुस गरेको प्रतिक्रिया दिने गरेका छन् ।
स्थानीय उपभोक्ताका अनुसार बजारमा ब्रान्डेड वा आकर्षक डिजाइनका जुत्ता किन्न हजारौँ रुपैयाँ खर्च गर्नुपर्ने अवस्था छ । तर तुलनात्मक रूपमा कम मूल्यमा विकल्प पाउँदा दैनिक जीवनका आवश्यक सामग्री व्यवस्थापन गर्न सहज भएको उनीहरूको भनाइ छ ।
बदलिँदो समयसँगै फेसन र जीवनशैलीमा आएको परिवर्तनले जुत्तालाई केवल आवश्यकता मात्र नभई व्यक्तित्वको हिस्सा बनाइदिएको छ । विद्यालय, कार्यालय, व्यवसाय, सामाजिक कार्यक्रमदेखि दैनिक जीवनसम्म जुत्ताको प्रयोग अपरिहार्यजस्तै बनेको अवस्थामा उपभोक्ताले गुणस्तरीय र बजेटमैत्री विकल्प खोज्नु स्वाभाविक मानिन्छ ।
यही आवश्यकतालाई मध्यनजर गर्दै सञ्चालन गरिएको जुत्ता मेला विशेषगरी कम आय भएका नागरिक, विद्यार्थी, श्रमिक तथा सीमित बजेटमा गुणस्तरीय सामग्री खोज्ने उपभोक्ताका लागि उपयुक्त गन्तव्यका रूपमा विकसित हुँदै गएको देखिन्छ ।
व्यापारिक क्षेत्रमा बढ्दो प्रतिस्पर्धाबीच सेवा, मूल्य र उपभोक्तामैत्री सोचलाई प्राथमिकता दिने व्यवसायहरूले मात्र बजारमा विश्वास जित्न सक्ने व्यवसायीहरू बताउँछन् । सस्तो मूल्यमा गुणस्तरीय सामग्री उपलब्ध गराउने अवधारणाले उपभोक्ताको भरोसा जित्दै गएको र आगामी दिनमा थप सेवा विस्तार गर्ने योजना रहेको सञ्चालक पक्षले जनाएको छ ।
बिर्तामोडमा सञ्चालनमा रहेको यो जुत्ता मेला केवल व्यापारिक गतिविधिमा सीमित नभई महँगीको चपेटामा परेका उपभोक्तालाई केही राहत दिने प्रयासका रूपमा पनि हेरिएको छ । न्यून मूल्य, सहज पहुँच र विविध विकल्पका कारण यो मेला उपभोक्तामाझ लोकप्रिय बन्दै गएको देखिन्छ ।
