आवधिक नगर विकास योजना तयार पारि सभामुख देवराज घिमिरेका स्वकीय सचिव केशव राज ढुंगेलद्वारा अर्जुनधारा नगरपालिकालाइ हस्तान्तरण गर्नुभएकोे छ । अर्जुनधाराका स्थानिय हाल सभामुख घिमिरेको सचिवालयमा कार्यरत केशवराज ढुङ्गेलले तयार पारेको आवधिक नगर विकास योजना हस्तानतरण गरिएको हो । सोमबार नगरपालिकाको सभाहलमा भएको एक समारोहमा कार्यक्रमका पमुख अतिथि देवराज घिमिरे साथै योजना तर्जुमाका सहजकर्ता ढुङ्गेलले उक्त पुस्तक नगर प्रमुख बलदेव सिंह गोम्देनलाई हस्तानतरण गर्नुभएको हो । अर्जुनधारा नगरले प्रत्येक बर्ष आवधिक योजनाकालागि बजेट बिनियोजन गर्दै आएको भए पनि काम हुन नसकेको नगर प्रमुख गोम्देनले जानकारी दिनुभयो । योजना निर्माणकालागि नगरले ४० लाख रुपैंया बजेट विनियोजन गरे पनि योजनाकार ढुंगेलले नगरलाई निशुल्क उक्त आवधिक योजना निर्माण सम्पन्न गरी प्रदान गर्नुभएको हो । नगरले निर्धारण गरेको बजेट अन्य विकास निमार्णका काममा खर्चिन समेत सहजकर्ता ढुङ्गेलले आग्रह गर्नुभएको छ । आफु नगरबासी भएको हैसियतले सामाजिक उत्तरदायित्व वहन गर्दै योजना तयार गरी नगरलाई प्रदान गरेको उहाँले बताउनुभयो । अर्जुनधारा नगरपालिकाको परिकल्पना, लक्ष, उदे्श्यहरु, रणनीति र कार्यनीतिको निर्माण, पालिकाका सवल पक्षहरु, सुधार गर्नुपर्ने पक्षहरु, अवसरहरु र चुनौतीहरुको विश्लेषण, विषयगत समितिको नेतृत्वमा लक्ष, उदे्श्यहरु, रणनीति र कार्यनीतिहरुको निर्माण र विषयगत समितिहरुको सोच, लक्ष लगायतका बिषय बस्तु आवधिक योजनामा समेटिएको सहजकर्ता ढुङ्गेलको भनाई छ । उहाँले अर्जुनधाराको भौतिक पूर्वाधारको विकासलाई व्यवस्थित गर्न, रोजगारीका अवसरहरु सृजना गर्न र कृषि पेशालाई सम्मानित पेशाको रुपमा रुपान्तरण गर्न बृहत, दिर्घकालिन र व्यवस्थित योजना तर्जुमाको खाँचो महशुस गरेर नगरलाई आवधिक योजना निशुल्क तयार पारिदिएको बताउनुभयो । शिक्षा, स्वास्थ्य, प्रविधि, कृषि, खेलकुद, रोजगारी लगायतका बिषय योजनामा समेटिएका छन् । त्यस्तै नगरप्रमुख गोम्देनले नगरले आवधिक योजनाकालागि छुट्याएको बजेटले शनिश्चरे बजारमा अत्याधुनिक सुविधा समपन्न शौचालय निमार्ण गरिएको बताउनुभयो । नगरलाई निशुल्क योजना सहितको पुस्तक हस्तातरण गरेको प्रति नगर प्रमुख गोम्देनले ढुङ्गेलप्रति आभार सहित उहाँको प्रशंसा समेत गर्नुभएको छ ।